PET/CT FDG

PET-CT FDG er ei avansert bildediagnostisk undersøking som kan vise metabolsk aktivitet i celler og vev. Før undersøkinga får du ei lita mengde radioaktivt sporstoff (FDG) i ei blodåre. Deretter blir det tatt bilde av kroppen. Dette blir gjort for å påvise ulike sjukdommar. Undersøkinga blir først og fremst brukt for å oppdage og følge opp kreft. Den kan også vere nyttig ved nevrologiske og revmatologiske sjukdommar, hjartesjukdommar og ulike betennelsar.

Det finst fleire ulike PET-CT-undersøkingar, denne teksten gjeld berre for deg som skal til FDG PET-CT undersøking.

Ring oss med ein gong du får innkallingsbrevet for å bekrefte timen din. Vi må bestille det radioaktive stoffet spesielt til deg.

Når du bekreftar timen, må du gi oss beskjed dersom du:

er gravid eller mogleg gravid, eller ammar
går i dialyse
har diabetes (sjå meir informasjon under)
er forkjølt eller har nyleg fått ein infeksjon
har nyleg fått cellegift eller strålebehandling
får behandling med steroid (for eksempel kortison) eller vekstfaktor

Gravide eller små barn bør ikkje vere med som følgespersonar.

Før

Du skal faste i minimum 6 timar før undersøkinga. Det betyr at du ikkje skal ete eller drikke noko anna enn reint vatn (ikkje smakstilsett eller med kolsyre). Vi anbefaler at du drikk 2-4 glas lunkent vatn før undersøkinga.
Ingen røyk, snus, pastillar eller tyggegummi dei siste 6 timane før undersøkinga.
Du skal ikkje drive noka form for fysisk aktivitet dei siste 24 timane før undersøkinga.
Det er viktig at du held deg varm og ikkje frys same dag som undersøkinga.
Du kan ikkje ha på deg smykkar eller andre metallgjenstandar under skanninga. La dette bli heime på undersøkingsdagen.

Har du diabetes?

Undersøkinga blir best når blodsukkeret er godt regulert.

Ta med matpakke og diabetesmedisinar på undersøkingsdagen.
Førebuing er ulike utor kva diabetesmedisin du bruker.

Om du tar insulin:

Et mat og ta insulin som vanleg kvelden før undersøkinga. Deretter skal du faste til undersøkinga er ferdig. Du kan drikke reint vatn, som beskrive over.
Du skal ikkje ta morgondose insulin.
Du kan ete og ta insulin med ein gong undersøkinga er ferdig.

Om du bruker insulinpumpe

Du skal faste frå midnatt. Insulinpumpa skal gå som vanleg.
Du kan drikke reint vatn, som beskrive over.

Om du bruker tablettar

Bruker du medisinar som inneheld metformin skal du ikkje ta desse dei siste 72 timane før undersøkinga. Du kan starte med desse medisinane igjen når undersøkinga er ferdig.
Om du bruker Glimepirid Teva (eller Amaryl), skal du ikkje ta morgondosen før undersøkinga, men etter undersøkinga saman med mat.

Under

Undersøkinga inneber at du får ein venekanyle i ei blodåre. Vi set det radioaktive sporstoffet inn i venekanylen. Mengda av radioaktivt stoff er liten og gir svært sjeldan biverknader.

Etter at du har fått det radioaktive stoffet skal du ligge heilt i ro, utan å snakke, lese eller halde på med telefonen i eit rom med dempa belysning i 30–90 minutt. Dette er viktig for at opptaket av stoffet skal bli optimalt. Om du har med deg pårørande til denne undersøkinga, må den/dei forlate undersøkingsrommet når det radioaktive stoffet blir sett i armen din.

1–2 timar etter at du har fått det radioaktive stoffet kan bilda takast. Bildetakinga tar 20–40 minutt.

Moglege forseinkingar

Dessverre kan det nokre gonger oppstå problem under produksjonen/leveransen av det radioaktive stoffet. Dette kan medføre at undersøkinga må utsettast til ein annan dag. Dette veit vi dessverre ikkje før same morgon, og det kan vere at vi ikkje får gitt deg beskjed om dette før ved frammøte.

Etter

Om du skal reise med fly dei neste 24 timane etter undersøkinga må du gi oss beskjed om dette. Du vil da få med nødvendig skriftleg informasjon.

Resultatet av undersøkinga blir sendt til legen som tilviste deg.

Ver merksam

Mengda radioaktivt stoff er liten, og gir svært sjeldan biverknader.

Sist faglig oppdatert 10/15/2025