Pasieantamátkkit (Pasientreiser, samisk)
Jus leat leamaš divššus, de sáhtát ohcat gokčojuvvot mátkegoluid. Jus dárbbašat heivehuvvon fievrrideami nu ahte beasat dikšui, de dus sáhttá leat vuoigatvuohta oažžut ovddalgihtii diŋgojuvvon fievrrideami.
Gaskaboddosaš rievdadeapmi mii guoská pasieantamátkkiide biillain lea loahpahuvvon
Dál čađahuvvojit pasieanttamátkkit nugo ovdal pandemiija. Geassemánu 1. beaivvi 2022 rájes galgá duođaštangáibádus čájehuvvot go mátkkošta biillain. Divššodeaddji ferte duođaštit ahte don fertejit vuoddjit biillain dearvvašvuođadili dihte, vuoi oaččut gokčojuvvot lassi olggosgoluid biilafergii, parkeremii, bummii ja biikadehkkii. Maiddái jos áiggut ohcat oažžut doarjaga mátkái mii lea almmolaš fievrrideami unnimus dáksta guovllu siskkobealde, de fertet čájehit divššodeaddji duođaštusa iežas biilageavaheapmái.
Oppalaš mearrádusat pasieantamátkkiid birra
Váldonjuolggadus lea ahte don oaččut gokčojuvvot olggosgoluid du pasieantamátkái fásta supmiin juohke kilomehteris (dábálaš máksomearri), vaikko makkár fievrrideami geavahat. Don fertet máksit iežasoasi mátkkis, jus dus ii leat friddjakoarta. Mátkki ferte leat guhkit go logi kilomehter juohke guvlui, ja ferte mannat unnimus ovtta dáksta guovllu rastá almmolaš fievrridemiin.
Don sáhtát ohcat gokčot goluid guhtta máno maŋŋel go mátki lea čađahuvvon.
Oza doarjaga mátkegoluide
Go logge HelseNorge siidduide de sáhttá digitálalaččat ohcat doarjaga pasieantamátkkiide mat gusket almmolaš dohkkehuvvon divššuide, doarjaga sáhtát ohcat goappašiid guvlui.
Jus it hálit digitála bálvalusa geavahit, de sáhtát deavdit mátkkoštanrehketskovi ja sáddet báberskovi pasieanttamátkki DF:i. Báberohcanskovi gávnnat divššodanásahusas dahje Helsenorge siiddus.
Dárbu heivehuvvon fievrrideapmái?
Jus don it sáhte almmolaš fievrridemiin mátkkoštit dearvvašvuođadilliid dahje johtalusa dihte, dahje jus it sáhte ieš vuoddjit dahje it oaččo muhtima doalvut, de soaitá dus vuoigatvuohta oažžut ovdagihtii diŋgojuvvon fievrrideami. Dat mearkkaša ahte báikkálaš pasieantamátkekantuvra organisere du mátkki, ja sii válljejit fievrrideami mii lea heivvolaš. Jus dus ii leat friddjenágga dahje friddjakoarta, de mávssát dušše iežasoasi mátkkis. Loga eambbo dáppe: Ovddalgihtii diŋgojuvvon fievrrideapmi.
Go logget Helsenorge siidduide de gávnnát obbalašgova ja dieđuid ovdagihtii diŋgojuvvon pasieantamátkkiid birra. Don sáhtát rievdadit, eretcealkit ja dohkkehit mátkki. Áiggi mielde galgá maid leat vejolaš diŋgot ovdagihtii dohkkehuvvon fievrredeami.
Váldde oktavuođa pasieantamátkkiin
Leat go dus gažaldagat, dárbbašat go veahki deavdit ohcamiid dahje veahki mátkediŋgojupmái? Riŋge pasieantamátkkiide 05515
Maŋemus ođastuvvon 2023-12-14