Hei, du må oppdatere nettleseren din for å kunne besøke oss.
Ansvarlig foretak: Finnmarkssykehuset

Dikšu

Geahpedeaddji dikšu

Ollu pasieanttat geain leat heaggaváralaš dávddat bohtet dárbbašit geahpedeaddji dikšui. Dárbu palliatiiva dikšui sáhttá leat erenoamáš stuoris go lea oanehis eallináigi. Geahpedeami sáhttá oažžut iešguđet lágan dálkkodemiin, ságastallamiiguin ja praktihkalaš vehkiin maid oažžu iešguđet dearvvašvuođabargiin.

Geahpedeaddji divššu (palliašuvdna dahje palliatiiva dikšu) ulbmil lea buoridit eallima, sihke dutnje ja du oapmahaččaide buot muttuin go lea duođalaš dávda. Váldofokus lea eastadit ja geahpedit dávdamearkkaid nugo bákčasa, váibmogákkaheami ja lossamiela, ja veahkehit go bohtet vuoiŋŋalaš/eksistensiála hástalusat ja eará váttut mat duođalaš dávddain sáhttet boahtit.

Geahpedeaddji dikšu galgá fállojuvvot buohkaide geat dárbbašit dan, beroškeahttá dávdamearkkas, prognosas ja orrunbáikkis. Ovttaskas dearvvašvuođabargi sáhttá addit buori veahki, muhto dávjá bohtet olbmot geain leat iešguđet lágan bargoduogážat ovttasbargat duinna ja du oapmahaččaiguin vai don oaččut buoremus divššu ja čuovvoleami. Buorre ovttasbargu gaskkal buohcciviesu ja suohkana dearvvašvuođabargiid lea guovddážis.

Pasieanttat geain lea dárbu geahpedeaddji dikšui sáhttet leat hui iešguđetláganat. Árra muttus sáhttet muhtumat leat ollásit bargonávccalaččat vaikko dávdda ii sáhte buoridit. Maŋit muttus sáhttet pasieanttat ollásit veahkedárbbašeaddjit. Mis leat dávjá pasieanttaid geain lea borasdávda, muhto maiddái pasieanttat geain leat duođalaš váibmo- ja varrasuotnavigit, bistevaš geahpesdávddat ja nevrologalaš dávddat sáhttet dárbbašit geahpedeaddji divššu.

Odne leat Norggas stuorimus oassi borasdávdapasieanttat geat ožžot spesialiserejuvvon geahpedeaddji divššu. Ođđaáigásaš borasdávdadikšu dahká ahte eambbo pasieanttat ellet guhkibut dávddain, ja measta buot borasdávdapasieanttat dárbbašit kvalifiserejuvvon geahpedandivššu bákčasiidda/dahje eará giksašuhtti dávdamearkkaid vuostá daid maŋemus mánuid go ellet. Dasa lassin lea pasieanttain geat ellet guhká borasdávddain, mii lea dego bistevaš dávda, dárbu geahpedeaddji dikšui ja fuolahussii muhtun áigodagain go sis lea dávda.

Mii šaddat dávjá árvvoštallat man bistil ja man ollu divššu mii galgat addit iešalddis borasdávdii. Du háliidusa ja du gelbbolašvuođa dávdda birra lea dehálaš váldit vuhtii. Du dábálašdilálašvuođas lea maiddái stuora mearkkašupmi dasa makkár divššu don berret oažžut. Go mii plánet, álggahit ja loahpahit divššu, de dárbbašit mii dus ja du oapmahaččain dieđuid, dus galgá dasa lassin maid buorre gulahallan doaktáriin. Don oaččut dieđuid das, maid sáhtát vuordit viidásit dávdda ovdáneami ja mii lea dikšuma ulbmil mii dutnje fállojuvvo. Go lea ovdánan duođalaš buohcuvuohta, de dávddaid vuođul dikšun ja ovdánan doarjjadikšun nugo artifisála biebmu dávjá dagahit heajos beaktilvuođa, ja seammás leat lossat ja iešalddes sáhttet dagahit stuorra váttuid.

Fágaidrasttideaddji ovttasbargu

Dávjá leat máŋga iešguđet lágan ámmátjoavkku mat ovttasbarget vai don ja du oapmahaččat ožžot buoremus divššu ja čuovvoleami. Vuollelis lea oassi fálaldatlisttus čállojuvvon. Gávdnojit go dát fálaldagat, vuolgá buohcceviesus buohccieissui, don oaččut dieđu doaktáris maid don sáhtát geavahit.

 

Buohcciviesuin lea doaktáriin ja buohccedivššáriin ovddasvástádus  dálkkaslaš dikšui, ja geahpedeaddji dikšui. Lea dávjá dárbbašlaš ahte lea ovttasbargu eará ámmátjoavkkuiguin ja/dahje pallatiiva joavkkuin, muhto seaŋgalanja dahje poliklinihka bargiin lea váldoovddasvástádus go don leat buohcciviesus.

Fástadoavttir lea guovddáš doarjja go leat duođalaš buohcci, ja sus lea ovddasvástádus čuovvolit du go leat ruovttus. Sihke don, du oapmahaččat ja spesialistadearvvašvuođabálvalus berre geahččalit doalahit oktavuođa fástadoaktáriin olles dávdaáigodagas. Fástadoavtterortnega birra gávnnat dieđuid dáppe www.helfo.no.

Suohkaniid buohccedivššárat barget eanas divššuin ja fuolahemiin, sihke ruovttubálvalusas ja buhcciidruovttus. Sii ja fástadoavttir oktiiheivehit gulahallama eará dearvvašvuođabargiiguin suohkandearvvašvuođabálvalusas.

Duođalaš dávddat sáhttet mielddisbuktit iešguđet lágan hástalusaid ja givssiid. Fysioterapevta sáhttá earret eará veahkehit doaibmanhárjehallamiin, dávdamearkageahpedemiin, láhčimiin ja movt birget árgabeaivvis mii lea rievdan.

Duođalaš dávddat sáhttet dagahit hástalusaid birget beaivválaš aktivitehtaiguin. Ergoterapevta sáhttá veahkehit hárjehallat, heivehit dahje láhčit beaivválaš aktivitehtaid, ja gaskkustit veahkkegaskaomiid.

Sosionoma veahkeha du ja du oapmahaččaid duođalaš dávdda sosiála váikkuhusaiguin. Nugo addit dieđuid, rávvagiid ja bagadusaid, ja veahkehit ohcamiiguin ja eará báberbargguiguin.

Báhpain ja diakonain geat barget dearvvašvuođaásahusain lea erenoamášgelbbolašvuohta. Sin sáhttá sihtat boahtit jus dus dahje du oapmahaččain lea dárbu hupmat muhtumiin duođalaš dávdda birra. Ságastallama fáttá mearridat álot don/mearridit oapmahaččat. Sáhttet leat ovdamearkka dihte vuoiŋŋalaš dahje eksistensiála jearaldagat morraša ja heahtedili, persovnnalaš dahje bearašlaš váttisvuođaid birra. Buohcciviessobáhpas dahje diakonas lea guhkes vásáhus hupmat olbmuiguin geat leat morrašis ja heahtedilis. Lea maiddái vejolaš oažžut oktavuođa eará osku- ja eallinoaidnoservodaga áirasiiguin.

Palliatiiva joavkkus leat iešguđet lágan dearvvašvuođabargit geat leat spesialisttat geahpedeaddji divššus. Joavkkus leat miellahtut muhtun dahje buot ámmátjoavkkuin mat badjelis leat namuhuvvon. Joavku sáhttá veahkehit dakko gokko lea dárbu, maiddái du luhtte ruovttus dahje báikkálaš buhcciidruovttus. Ovttas suohkandearvvašvuođabálvalusain, duinna ja du oapmahaččaiguin ráhkada joavku plána movt viidáset dikšu ja čuovvoleapmi galgá leat.

Muhtun buohcciviesuin lea palliatiiva joavkkus ovddasvástádus sierra seaŋgaossodahkii gos lea geahpedeaddji dikšu. Suohkanlaš buhcciidruovttuin sáhttet maid leat dakkár ovttadagat, dahje doppe leat muhtun seaŋggat várrejuvvon pasieanttaide geat dárbbašit geahpedeaddji divššu.

Buot guovlluin riikkas, ja eanas dearvvašvuođaásahusain ja suohkaniin, gávdnojit fierpmádagat main leat mielde borasdávdafuolahusa ja geahpedeaddji divššu resursabuohccedivššárat. Fierpmádagat main leat fysio- ja ergoterapevttat leat maid olámuttos máŋgga fylkkas.
Fierpmádagaid resursaolbmuin lea gelbbolašvuohta ja erenoamáš beroštupmi geahpedeaddji dikšui. Sii sáhttet addit rávvagiid ja dieđuid fálaldagaid birra mat gávdnojit ja dan birra mot láhčit ruovttu. Sii sáhttet maid leat buorit ságastallanolbmot geat sáhttet muitalit ja bagadallat divššu liigeváikkuhusaid birra ja dávdamearkkaid geahpedeami birra.

Čujuhus ja árvvoštallan

Geahpedeaddji divššu dárbu rievddada pasieanttas pasientii. Buohkat geat barget dearvvašvuođadoaimmahagas galget sáhttit fállat geahpedeaddji divššu. Sáhttá goitge leat nu ahte muhtun pasieanttain leat hui ollu givssit oktanis dahje hui garra givssit, nu ahte lea dárbu čujuhit sin palliašuvnna spesialisttaid lusa, vai ožžot dárbbašlaš buori divššu.

Go buohcceviessu oažžu čujuheami, de lea doavttir gii árvvoštallá dan. Heahtemuddu árvvoštallojuvvo juohke ovttaskas dáhpáhusas. Du dábálaš dearvvašvuođadilálašvuohta ja du dávdamearkagovva leat dehálaš oasit mat berrejit váldot mielde árvvoštallamis.

Pasieanta gii sáddejuvvo palliatiivadivššu spesialisttaid lusa, galgá dieđu ožžon lea go sus buoritkeahtes dávda, ja lea go dárbu dávdamearkkaid geahpedeapmái ja/dahje spesialiserejuvvon palliatiivabálvalussii.

Før

Under

Etter